ସବୁ ତୁମରି ଇଚ୍ଛା
ସବୁ ତୁମରି ଇଚ୍ଛା
ସବୁ ତୁମ ଇଚ୍ଛା ଆହେ ଭାବଗ୍ରାହୀ
ତୁମେ ଇଚ୍ଛାମୟ ହରି
ତୁମରି ଇଚ୍ଛାରେ ଏ ସୃଷ୍ଟି ସମ୍ଭାର
ଧନ୍ୟ ତୁମ କାରିଗରୀ ।
ତୁମରି ଇଚ୍ଛାରେ ସୂର୍ଯ୍ୟ ଚନ୍ଦ୍ର ଯାତ
ଆକାଶେ ଚନ୍ଦ୍ରମା ଭାସେ
ତୁମରି ଇଚ୍ଛାରେ ଦୂର ଗଗନରେ
କେତେ ତାରା ଫୁଲ ଭାସେ ।
ତୁମରି ଇଚ୍ଛାରେ କଳା ବାଦଲରୁ
ଅମୀୟ ପୀୟୁଷ ଝରେ
ତୁମରି ଇଚ୍ଛାରେ ସାଗର ତରଙ୍ଗ
କୂଳ ଛୁଇଁ ଯାଉଥାଏ ।
ତୁମରି ଇଚ୍ଛାରେ ପଥର ବୁକୁରୁ
ଝର୍ଝର ଝରଣା ଝରେ
ତୁମରି ଇଚ୍ଛାରେ ଶ୍ୟାମଳ କ୍ଷେତରେ
ସୁନାର ଫସଲ ଭରେ ।
ତୁମରି ଇଚ୍ଛାରେ ଫଳରେ ମିଷ୍ଟତା
ଫୁଲରେ ସୁବାସ ଭରେ
ତୁମରି ଇଚ୍ଛାରେ ଏ ଜଗତ ଚାଲେ
ସୃଷ୍ଟି ସମ୍ଭାରରେ ଭରେ ।
ତୁମରି ଇଚ୍ଛାରେ ସୃଷ୍ଟି ସ୍ଥିତି ଆଉ
ବିଲୟର ସ୍ଵର ଶୁଭେ
ତୁମ ଭରସାରେ ପଙ୍ଗୁ ଲଙ୍ଘେ ଗିରି
ଅନ୍ଧ ଯେ ବାଟ ଦେଖାଏ ।
ତୁମରି ଇଚ୍ଛାରେ ଶ୍ରେଷ୍ଠ ଜୀଵ ହୋଇ
ମଣିଷ ଧରାରେ ଜାତ
ଏ ଭବ ସାଗରେ ତୁମେ ତ ନାଉରୀ
ଇଚ୍ଛାରେ ହେ ପାରି କର ।
ତୁମରି ଇଚ୍ଛାରେ ଏ ଭବ ସଂସାରେ
ସୁଖ ଦୁଃଖ ଖେଳ ଚାଲେ
ଜୀବନ ଡଙ୍ଗାର କର୍ମ ଆହୁଲାରେ
ମଣିଷ ଯେ ବାଟ ଚାଲେ ।
ତୁମରି ଇଚ୍ଛାରେ ଏ ସୁନ୍ଦର ସୃଷ୍ଟି
ଭବ୍ୟ ଭାବନା ରେ ଭରେ
ତୁମରି ଇଚ୍ଛାରେ ନିରାଶା ମନରେ
ଆଶାର ସଂଚାର ହୁଏ ।
ତୁମରି ଇଚ୍ଛାରେ ସବୁ ଘଟୁ ପ୍ରଭୁ
ଭାବର ସମୀର ବହୁ
ଭାବମୟ ତୁମେ ଆହେ ଲୀଳାମୟ
ତୁମ ଇଚ୍ଛା ପୂର୍ଣ୍ଣ ହେଉ ।
ତୁମରି ଇଚ୍ଛାରେ ହସ ଲୁହ ଆସୁ
ଆସୁ ହେ ଅବା ପ୍ରଳୟ
ଧୈର୍ଯ୍ୟର ଶିଳାଟେ ସ୍ଥାପନ କର ହେ
ତୁମେ ଅଟେ ଇଚ୍ଛା ମୟ ।
ଏ ଜଗତ ଚାଲୁ ତୁମରି ଇଚ୍ଛାରେ
ଆଶା ନିରାଶା ମଧ୍ୟରେ
ହେଲେ ଏ ମଣିଷ ତୁମକୁ ନ ଭୁଲୁ
ଏଇ ମାତ୍ର ମନ ଚାହେଁ ।
ଆହେ ଇଚ୍ଛାମୟ ତୁମରି ଆଶିଷ
ଜଗତେ ଅଜାଡି ଦିଅ
ତୁମ ସୃଷ୍ଟି ହେଉ ମଧୁମୟ ପ୍ରଭୁ
ଜଗତକୁ ଦିଶା ଦିଅ ।