Library
ପୂର୍ବ ପରିଚିତ ରୂପ
ପୂର୍ବ ପରିଚିତ ରୂପ
ରଥେ ରଥାରୁଢ଼ ରଥାଙ୍ଗପାଣିଙ୍କୁ
ଦେଖି ତୋଷ ଅଛି ଚିତ୍ତ
ରଥାଙ୍ଗପାଣି ନାମେ ବିଦିତ ବିଷ୍ଣୁ
ନୀଳାଚଳେ ଜଗନ୍ନାଥ
ଦେଖିବାକୁ ଆଶା ଉଜ୍ଜୀବିତ ଅଛି
ପୂର୍ବ ପରିଚିତ ରୂପ
ଯେଉଁ ରୂପେ ଗୋପେ ମନ ମୋହି ଅଛ
ଯେଉଁ ରୂପ ଅପରୂପ
ଗଜ ରାଜ ଡାକ ମୃଗୁଣୀ ଆରତ
ଶୁଣିଲା ବେଳର ରୂପ
ବଳୀ ଦ୍ୱାରେ ଯେଉଁ ରୂପ ଧରି ଥିଲ
ଦେଖାଅ ପ୍ରଭୁ ସେ ରୂପ
କୋଦଣ୍ଡ ଧାରଣ ରୂପ ଦେଖିବାକୁ
ମନରେ ଆଶା ନିହିତ
ଜାନକୀ ହରଣ ଅହଲ୍ୟା ତାରଣ
ସେହି ରୂପରେ ଜଡ଼ିତ
ଶବରୀ ଚାଖିବା କୋଳି ଖିଆ ବେଳେ
କେମିତି ଥିଲା ସେ ରୂପ
ଯଦିଓ ହେଉଛି ବେଶ ଅନୁଷ୍ଠିତ
ଦେଖାଅ ପ୍ରକୃତ ରୂପ ।
ସେହି ରୂପ ମୋତେ ଦେଖାଅ ମାଧବ
ଯେଉଁ ରୁପେ ରାଧା ଭାବ
ଭାବ ବିନୋଦିଆ ନାମ ବହି ଅଛ
ପୂରଣ କର ମୋ ଭାବ
ଯେଉଁ ରୂପ ହୋଇ ଗାଈ ଚରାଇଲ
ଗୋପ ପୁରେ ନନ୍ଦ ଘରେ
ସେହି ରୂପ ଥାଇ ଦିଅ ଦରଶନ
ନିବେଦନ ଶ୍ରୀପୟରେ
ଯେଉଁ ରୂପେ କୋଟି ବସ୍ତ୍ର ଦେଲ ଯାଚୀ
କୁରୁପତି ସଭା ସ୍ଥଳେ
ସେହି ରୂପେ ପ୍ରଭୁ ଦିଅ ଦରଶନ
ଦେଖିବାକୁ ମନ ବଳେ
ପାର୍ଥ ର ବିଷାଦ କରିଛ ଖଣ୍ଡନ
ଦେଖାଇଛ ବିଶ୍ଵରୂପ
ସଖା ହିତେ ସଖା ଭାବରେ ନିଯୁକ୍ତ
ରଥରେ ସାରଥୀ ରୂପ ।
ସେଇ ସବୁ ରୂପ ବେଶ ଆକାରରେ
ଶ୍ରୀକ୍ଷେତ୍ରରେ ଶ୍ରୀମନ୍ଦିରେ
ରଥାଙ୍ଗପାଣି ଙ୍କ ପ୍ରକୃତ ସ୍ବରୂପ
ଦେଖିଛ କେହି ନେତ୍ରରେ ?
