ପରିକ୍ରମା ପୁରୀ ରୁ ଅଯୋଧ୍ୟା

ସୁନ୍ଦରୀ ହଳଦୀ ବସନ୍ତ ମଉନେ

ପୁଣି ଉଦାସ ମନରେ

ବସି ବୃକ୍ଷ ଡାଳେ ଦୂରକୁ ଚାହିଁଛି

ନିର୍ଣ୍ଣୀମେଶ ନୟନରେ

ସାଥୀ ବିନା କିଛି ଭଲ ଲାଗୁ ନାହିଁ

ଫିକା ଫିକା ସବୁ କିଛି

ଫେରିବା ପଥକୁ ଚାହିଁ ବସି ଅଛି

ମନରେ ଶଙ୍କା ଉଠୁଛି

ଯେବେ ସାଥୀ ଥାଏ ପାଖେ ପାଖେ

ତନ ମନରେ ଆବେଗ

ସାଥୀ ବିନା ଲୁପ୍ତ ହୃଦୟ ଆବେଗ

ନାହିଁ ସୁଖ ଓ ସରାଗ

ବସନ୍ତ ମଳୟ ବହୁଛି ଧରାରେ

ମନ ହୁଏ ହନ୍ତ ସନ୍ତ

ସଜ ଫୁଟା ଫୁଲ ଲାଗୁଛି ମଉଳା

ସାଥୀ ବିନା ଏ ବସନ୍ତ

କଥା ଦେଇଥିଲା ହାତେ ହାତ ଧରି

ଆସି ଅଛି ଶୁଭ ବେଳ

ପରିକ୍ରମା ପଥ ପୁଣି ଅଯୋଧ୍ୟାକୁ

ଯିବାକୁ ହେବ ତକ୍ତାଳ

ସାଥୀ ହୋଇ ଯିବା ଦର୍ଶନ କରିବା

କଥା କୁ ଦେଇ ଏଡେଇ

ଏତେ ଦୂର ବାଟ ଯାଇ ପାରିବିନି

କାହିଁକି ରଖିଲି କହି

ହେଉ ତୁମେ ଥାଅ ଭଲେ ଏହି ଠାରେ

କହି ଯାଇଅଛି ସାଥୀ

ସବୁ ସମାରୋହ ଶେଷ ହେଲା ପରେ

ଫେରିବ ନିଶ୍ଚେ ସମ୍ପ୍ରତି

ଖୁସି ମନାଉଛି ଏ ମଣିଷ ଜାତି

ରାମ ରାଜ୍ୟ ଆଶା କରେ

ଏଠି ଶହ ଶହ ରାବଣ ରାଜୁତି

କେବଳ ରାମ ମୁଖରେ

ସରିଲାଣି ସବୁ ଉତ୍ସବ ବେଭାର

ଆସୁ ନାହିଁ କାହିଁ ଫେରି

କି ଅବା ରହିଲା ନୂଆ ସାଥୀ ଧରି

ମନ ହେଉଅଛି ଘାରି

କିଛି ଅଘଟଣ ଘଟିଲା କି ଆଉ

ମନ ଜମା ବୁଝୁ ନାହିଁ

ତଥାପି ଫେରିବା ବାଟ କୁ ଚାହିଁଛି

ସାଥୀ ଭୁଲି ହେଉ ନାହିଁ

ପୁରୀ ରୁ ଅଯୋଧ୍ୟା ପରିକ୍ରମା ସାରି

ଆସ ଆସ ହେ ତ୍ୱରିତ

ଆଛା ଦିନ ଆମ ଆସୁ କି ନ ଆସୁ

ପଚାର ଖୁସି ଅଛୁ ତ!