ଗୁଲିଦଣ୍ଡା

ଡାକିଲି ବାବୁରେ ଶୁଣିଲୁ ମକୁନ୍ଦା

ଦିଶୁଛୁ ଶକତ ଭେଣ୍ଡା

ଓସ୍ତାଦ କାଳେ ତୁ ଅଟଉ ଖେଳରେ

ପ୍ରିୟ ତୋର ଗୁଲିଦଣ୍ଡା ।

କହିଲୁ ଶୁଣିବା ଖେଳନ୍ତି କେମିତି

ଭଲ କି ଖତରନାକ

ଆଖିରେ ମୁହଁରେ ବାଜିଲେ ଅଥାନେ

କ୍ଷତ ହେବା ସ୍ବାଭାବିକ ।

କହିଲା ମକୁନ୍ଦା ଶୁଣ ବଡଭାଇ 

ଭାରି ମଜାଦାର ଖେଳ

ଗୁଲିଦଣ୍ଡା ଠାରୁ ଜନମ କ୍ରିକେଟ

ପାଇବନି ଆଦିମୂଳ ।

ଯୋଗାଡିବ ଏକ ହାତେ ଲମ୍ବ ଦଣ୍ଡା

ଚାଖଣ୍ଡେ ମାପର ଗୁଲି

କରିବ ଗୋଜିଆ ଗୁଲି ଦୁଇ ପଟ

ଗୁଳ ଦେବ ଗୋଟେ ଖୋଳି ।

ଥୋଇବ ଗୁଳରେ ଗୁଲିକୁ ବାଗରେ

ଦଣ୍ଡାରେ କ୍ଷେପିବ ଦୂରେ

ଧରିଲେ ଶୂନ୍ଯରୁ କୌଣସି ଖେଳାଳି

ବିଚରା ପିଲାଟି ହାରେ ।

ଧରି ନ ପାରିଲେ ପାଇଥିବା ପିଲା

ଲକ୍ଷ୍ଯ କରି ଗୁଳ ପାଶେ

ଥୁଆ ହୋଇଥିବା ଦଣ୍ଡାକୁ ନିରେଖି

ଗୁଲିଟି ତୁରନ୍ତ ପେଶେ ।

ଦଣ୍ଡାରେ ବାଜିଲେ ଖେଳାଳି ଜଣଙ୍କ 

ପାଏନାହିଁ କିଛି ଅଙ୍କ

ନ ବାଜିଲେ ମଜା ଗୁଲି ଗୋଜା ମୁଣ୍ଡ

ଠୁକୁରାଇ ଦଣ୍ଡା ପିଟ ।

ଯେତେ ଦୂରେ ଯାଇ ପଡିବ ଗୁଲିଟି 

ଠିକଠାକ ଅନୁମାନ

ମାପଚୂପ କଲେ ହୋଇବ ଅଧିକ 

ନ ହେବ ଯେପରି କମ ।

ଖେଳୁଆଡ ପିଲା ଯିଏ ସେ କରିବ

ଅଧିକ ଦଣ୍ଡାର ଖେଳ

ଖଟେଇବ ସିଏ ଗଧ ବାପୁଡାକୁ

ଦେହୁ ନିଗାଡିବ ଝାଳ ।

ଗାଆଁ ଗହଳିର ପିଲା ଆମେମାନେ 

ପାଖରେ ତ ନାହିଁ ନୋଟ

କିଣି ପାରିବୁନି ଦାମିକା ବଅଲ

ଆଉ କିରିକେଟ ବ୍ଯାଟ ।

କହିଲା ମକୁନ୍ଦା ଚାଲି ନ ଜାଣିଲେ

ବାଟ ହୁଏ ନାହିଁ ଦୋଷୀ

ରହିଛି ବିପଦ ଖେଳରେ ସବୁଠି

ଥାଅ ବଡଭାଇ ଖୁସି ।।