ये ग पोरी माहेराला

पिटुकल्या झोपाळ्यावर

 इटुकली चैत्रागौर

 बाजूला नाचतात

 कलिंगडात कोरलेले मोर

तोतापुरी तले राघू 

मिठू मिठू बोलतात

 मिरची खाण्याऐवजी

 कैरी डाळ मागतात

गुढीची साखर माळ

 गळ्यात शोभते

 पाण्यावरची रांगोळी

 पराती मध्ये फुलते

आरास करण्यासाठी

 फुलांच्या परड्या

 समोर ताटामध्ये

 करंज्या आणि कुरडया

 हळदी कुंकवाला 

नटून थटून

सवाष्णी येतात

 कैरी डाळ आणि 

पन्ह्याने तृप्त  होतात

ओल्या फुगाण्याने

 भरायची त्यांची ओटी

 आयुष्य मागायचे

 कुंकवाच्या धन्यासाठी

माहेरवाशिणीचे 

लाड करायचे

 गोड धोड तिला

 खाऊ घालायचे

 हळूच झोका द्यायचा

 हलवायचा तिचा झुला

 आणि म्हणायचे दरवर्षी

 ये ग पोरी माहेराला