वसंत

लीला अजब सृष्टीची

चैत्र पालवी सजली

अलगद वसंतात

वृक्षावरी विसावली

साज लेऊन नवखा

आला बहर वसंता

रवि किरणांची माया

पानातून पाझरता

लाल केशरी फुलांनी

येई फुलून पळस

पर्ण विरहित सारा

वाटे वसंत लोभस

उन्हं तापते आभाळी

चैत्र पालवी नटते

स्वागतास वसंताच्या

गान कोकीळाही गाते

चिंच करवंद सारा

मेवा दुर्मिळ लाभतो

जेव्हा सुष्टीत अजब

सारा वसंत भिनतो

आम्र वृक्षा हा मोहर

धुंद करी आसमंत

मोद भरून रे उरी

येई घेऊन वसंत