वाणी

वाचा वाणी वैखरीचे

दैवदत्त वरदान

वाणी कुणाची मधुर

कधी ताडनाचे नाद

गोड वाणी जिंकितसे

सहजचि कुणालाही

येत गप्पांना बहर

स्थळ काळ विसरुनी

तिळगूळ प्रयोजन

गोड बोलावे म्हणूनी

भांडणांचा होत अंत

स्नेह गोड वाणीतुनी

गोड बोलूनी काढतो

काटा अलगद त्वरे

सावधान रहाणेच

चार कोस दूर बरे

कडू बोलावे लागते

पालकांस शिक्षकांस

शिस्त नि नियमांसाठी

मंत्र कठोर तयांस

खरा मित्र तोच असे

जाण देतसे धोक्यांची

कटू बोलणे तयाचे

अंती हो हितकरचि

वेळ काळ पाहूनिया

योग्य वाणी प्रयोजन

वक्ता दशसहस्त्रेषु

त्यास गौरविती जन