शीर्षक आला आला आषाढ

घननीळ नभी दाटे

आली आषाढाची झड

सरसर वेगे वेगे

तिला नसेनाच खळ

हिरवाई चहूकडे

सृष्टी बहरासी येते

वस्त्रे हिरवी लेऊनी

लाज लाजूनी हसते

असे आषाढ मासाला

थोर कालिदास मान

मेघ दूत होऊनिया

निरोपाचे करी काम

आला आषाढाचा मास

लेकी मना लागे आस

भाऊराया कधी येई

वाट बघे त्याची खास

आई आषाढ तळते

लेक आली माहेरास

गप्पा खेळात रंगते

भर येई आनंदास

असा आषाढ आनंदे

येतो झरझर वेगे

सुखवितो सृष्टीलागी

मोदवितो मनालागे