साठवण...

जरी सरले दिवस

आठवणी सतावती

क्षणी एखाद्या निवांत 

पुन्हा पुन्हा आठवती

घरे होती ती कौलारू 

ऐसपैस अंंगणे ती

कशी दाट दाट झाडी 

उभी भोवताली होती

शाळा होती जरी छोटी

भले मोठे पटांगण

होई करड्या शिस्तीत 

विद्यार्थ्यांचे विद्यार्जन 

नसे पाठीवर सॅक 

नाही बॉटल पाण्याची 

एका पितळी डब्यात 

पोळीभाजी असायची

खाऊ चिमणी दाताने 

खात होतो तो तोडून 

होता इवलासा खाऊ

मैत्री घट्ट ती अजून 

नसायची स्कूलबस 

आम्ही जायचो धावत 

रस्ता कटायचा सारा

छान कविता म्हणत 

जरी झालो आम्ही मोठे 

याद येती ते दिवस 

गावी होतो सारे गोळा

भेटीगाठीसाठी खास

होते उजळणी पुन्हा 

आठवती गोड क्षण 

जुन्या जरी आठवणी 

नव्यानेच साठवण