सारे जण प्रवासी येथे

सारे जण प्रवासी येथे येती न् जाती दूर

वळणा वरती परतून येतो आठवणींचा पूर

सारे जण प्रवासी येथे

बालपणी चा काळ सुखाचा

दुडू दुडू मागे पळताना

कधी संपला हे ही न कळले

वाटेवर त्या वळताना

तरुणपणी हे फुलपाखरू

आळवित येईल सूर

वळणा वरती परतून येतो आठवणींचा पूर

पडती गाठी कधी कुणाच्या

अश्रू झरती तुटताना

ओंजळ भरते कधी फुलांनी

कुणी संपते लुटताना

बहर हरवतो अवचित सारा

नियती होते क्रूर

वळणा वरती परतून येतो आठवणींचा पूर

प्रवास खडतर आयुष्याचा

सोसून सारे घाव

बनेल मूर्ती, घडेल किर्ती

गंधीत होईल नाव

अंती दिसशील हसताना तू

आनंदातच चूर

वळणा वरती परतून येतो आठवणींचा पूर