रे पावसा ...!

रे पावसा असो मनाची

वा मातीची पाषाणाची

कोरड्याठाक धरतीस या

आस तुझिया आगमनाची

टिपटिप तुझ्या संगितासवे

बेभान मजला आज नाचू दे

घन आले रे भावनांचे दाटून

आज हृदयी तळे साचू दे

थेंब थेंब मोतियांची माळा

लेऊन मजला सजू दे

जन्मभर थकल्या डोळ्यांस आज

एक घडी सुखाने निजू दे

पापण्यांच्या पुडीत लपलेली

आसवे सारी निचरू दे

थेंबांच्या पायऱ्यांवरूनी 

इंद्रधनू भुईवर उतरू दे

सप्तरंगी सावलीत त्याच्या

सात जन्म माझे रंगू दे

आस आसवांची तुझ्यात विरण्याची

दुखवून मजला न भंगू दे