प्राण्यांची शाळा

जंगलात प्राण्यांची शाळा

सुरू करावी एकदा 

सिंह राजांनी काढला

जोरदार फतवा

ससोबा आले धावत

छोटीशी वही घेऊन

पेन ऐटीत अडकवून

पहिल्या रांगेत बसून

कोल्हा म्हणाला माझे

जेवण नाही झाले

खाऊन अंमळ थोडे

उशीरानेच येणे

जिराफ म्हणाला सांगा

लिहू मी कसे काय?

मान माझी उंचच उंच 

वही धरायची कशी काय?

हत्ती म्हणाला मला

बसताच येत नाही

सोंडेत पेन धरुन

लिहिताच येत नाही

शिक्षक शिस्तीचे वाघोबा

डरकाळ्या फोडू लागले 

सगळे आले गुपचूप

अभ्यास करू लागले