पाऊस

रिमझिम झरती पाऊसधारा

वाहे मृद्गंधासह वारा

वरुण राजा जणू प्रकटला

सप्तरंगी धनू नभी उमटला

फुले पाने दवात भिजली

पाखरे हिरव्या कुरणी निजली

मयुर थुई थूई करिती नृत्य

पावसाचे असे त्यास अगत्य

शिवार भरले उभ्या पिकांनी

रस्ते भरले गर्द धुक्यांनी

कृष्णमेघ नभांगणी गरजती

क्षणात विद्युल्लता चमकती

चिंब चिंब ही झाली धरती

नद्या सागरा आली भरती

पावसा रे तू बरसत रहा

तृप्त आसमंत अन् दिशा दहा