आवडता चित्रपट

कोणता आहे तुमचा आवडता चित्रपट

विचारताच अनेक नावं आठवती पटापट

प्रत्येक चित्रपटाची असते एकेक खासियत

प्रेक्षकांसमोर मांडतो तो आपापली कैफियत

काही सिनेमे बघताना वळते हसून मुरकुंडी

काहींमध्ये असे फक्त मारझोड आणि भांडाभांडी

काही सिनेमे दाखवती सामाजिक दुःख व सुख

काही विचार करायला लावून करतात अंतर्मुख

काही चित्रपटात येते प्रेमकथेला उधाण

काहींमध्ये नायक देई देशासाठी प्राण

काही चित्रपटात नट-नटी वाहे कुटुंबाचा भार

काहींमधले नट-नट्यांना मिळे BMW कार

काही सिनेमात नट-नट्यांची असे सात्विक राहणी

काहींमधले असतात प्यायलेले बारा गावचे पाणी

काही सिनेमे बघता येतात सहकुटुंब सहपरिवार

काहींमध्ये असतो गूढ भय रहस्याचा थरार

काही सिनेमे करतात प्रेक्षकांचे निखळ मनोरंजन

काही दाखवती आरसा आणि घालतात नेत्रअंजन

सिनेमागृहातला असो वा असो टीव्ही वरचा फुकट

जो तो बघतो आवर्जून आपल्या आवडीचा चित्रपट