नटली वसुंधरा

हिरवा हिरवागार नेसली शालू ही वसुंधरा

नयनमनोहर दृश्य येथले आनंदाचा झरा

हिरवी झाडे वेली रंगीत फुले किती फुलली

सोळा शृंगार लेऊन जणू ही नववधू सजली

भिडला डोंगर जणू नभाला पाणी मागाया

धावत येतसे सरिता पाणी पृथ्वीला द्याया

नदी किनारी जमीन कसाया वस्तीही झाली

अर्धगोल आलिंगन द्याया नदी पुन्हा फिरली

शहरी जणांना भुरळ घातली या सौंदर्याने

उंच इमारती किती उभ्या राहिल्यात डौलाने

विज्ञानाची कास धरूनच केली जाते शेती

उभे विजेचे खांब येथले साक्ष तयाची देती

विशाल शीला इथे थांबल्या घट्ट पाय रोवुनी

कपडे काढून विसावती येथे पांथस्थ कुणी

कुण्या कलाकाराने सजवली नयनरम्य सृष्टी

साशंक वाटे येथे छाया चित्रकाराची ही दृष्टी