नागपंचमी

हाती भरुनी हिरवा चुडा

चेहऱ्यावरती नवी नव्हाळी 

तळवा रंगला मेहंदी ने

नागपंचमीला आली बाळी

सळसळता चंदेरी काठ

ल्याली नथ पाटल्या गोठ

गेली पूजा या वारुळाला

नाग रुपी भाऊरायाला

पंचमीचे फेर धरुनी

खेळू लागली झिम्मा फुगडी

नाव देता पती देवाचे

लाजून लाल झाली लाडी

कौतुके माय बाप पाहती

मैत्रिणीही चेष्टा करती

लाजुनी सांगे सर्वांना ती

त्यांची प्रीती बहु मजवरती

दिवसामागून दिवस चालले

वर्षामागून वर्षे सरली

ज्यांच्यासाठी ओढ माहेरची

ती माय बापे आता नुरली

आताही येते नागपंचमी

होती फेर झिम्मा गाणी

आठव येता माहेराचा

ओठी हासू नयनी पाणी