मुखवटा

मानवी जीवनाच्या रंगमंचावर

रोजच चढवावा लागे मुखवटा

कधी असे उत्सव आनंदाचा

कधी पाळावा लागे दुखवटा

स्वार्थ साधण्यासाठी असते

खोटीच आपूलकी मुखकमली

हेतू प्राप्तीसाठी करावी लागे

कोणाची प्रसंगी खोटी हमाली

व्यक्ती तितक्या प्रकृती जगी

कुणी चढवी मुखवटा कसा

मनात त्याच्या भाव जो असे

बोलतो त्याचा मुखडाच तसा

सोपे असले फसविणे जगास

मुखवट्यामागे लपवून मुख

स्वार्थी जनाला काय कळावे

दुःखितांचे काय असे दुःख

हास्य फुलविण्या दुःखितांचे

संग्रही ठेवावा असाही मुखवटा

चेहऱ्यामागचे दुःखही लपवून

पळवून लावू दीनांचा दुखवटा

जीवनाचा रंगमंच सजवावा

मुखवट्यांआड जपून संवेदना

वाटत रहावे हास्य आणि सुख

मगच अर्थ येईल या जीवना!!!