मनाचिये गुंते

तू मला तुझ्या मागे आरशात शोधावे

चूर चूर झालेल्या लाजण्यात शोधावे

पाकळीतले पेले मोगऱ्यातले प्यावे 

गार गार दवबिंदू त्या फुलात शोधावे 

वाढली किती गर्दी हासऱ्या सुगंधांची!

चोरपावलांना त्या हासण्यात शोधावे

आवजावच्या नोंदी कोरल्यात भुंग्यांनी 

स्वर्ण अक्षरी शेरे पाकळ्यात शोधावे

थांबली कुठे आहे आतली धुमश्चक्री.

का उगाच आगीला मी जगात शोधावे?

कोपऱ्यात बुद्धीच्या मोगरा विवेकाचा

तारतम्य थोडेसे कोपऱ्यात शोधावे 

कापडात गुंफीले ते मनाचिये गुंते -

कापडी जरी शेले मोगऱ्यात शोधावे