महामानव

भुकेल्यांस देतो अन्न , दुर्बलांस धीर

आंधळ्याची काठी होतो , तोच खरा थोर

जीवनात ध्येय त्याचे , सेवाभाव हेच

संकटात धाव घेई , पांडुरंग तोच

स्वार्थाचा ना लवलेश , नसे गाजावाजा

दुखल्याखुपल्यांसाठी , दिलदार राजा

सर्वजण समानच , नाही भेदभाव

सर्वांसाठी नित्य धावे , मनी बंधुभाव

नाव ना कुठे छापतो , नसे प्रसिद्धीत

चित्रगुप्त करी नोंद , तयाच्या खात्यात

देई आशिर्वच दुवे , सर्वच तयासी

निरपेक्ष सेवा हीच , आवड तयाची

सार्थक मनू जन्माचे , सेवेने साधतो

कर्म हीच पूजा माने , निगर्वी रहातो

नाही सेवेची मोजणी , पुण्य औक्षोहिणी

कर्मण्येवाधिकारस्ते , सदैव मानसी

अशा महामानवाला , कोटी नमस्कार 

सार्थकच जीवनाचे , कृतीने साकार