माझी मायबोली

प्रिय असते सर्वांना

आपुलीच मायबोली

वदते हितगुज मनीचे 

कळतेय तिची खोली

रसाळ अमृताहुनीही

माझी मराठी भाषा 

ज्ञानेश्वरांनाही उमगली

जागविली मनी आशा

नाही डामडौल तिचा 

साधी सरळ नि सोपी

प्रेमिकांच्या प्रेमातली

ठेवते हृदयातच कुपी

मोरोपंत श्रीधर कवींनी

अलंकारांनी सजविले

ज्ञाना तुका एकनाथांनी

तिज कीर्तनी भजविले

वाटतोय मराठी जनास

मायमराठीचा अभिमान

राखूया मिळून सारेजण

त्या माधुर्याचा सन्मान

देवी सरस्वतीही नाचते

कविंच्या ओठी सप्तसूर

ना अश्लिलतेचा काही

पूजिती मराठी नारी नर