माझी लेखणी

*अष्टाक्षरी रचना*

माझी लेखणी महान

अंतरात ओजबिंब

मनातले ओळखून

दावी मज प्रतिबिंब ||१||

छंद लागे लेखणीचा

विसरले देहभान

जन करती सकल

अमृताचे रसपान ||२||

लेखणीचा इतिहास

आहे मोठा घरंदाज

जगावर राज्य करी

तिचा तसाच अंदाज ||३||

भाळे सौंदर्यावरती

करी लेखणी शृंगार

हाच मदन ठसका

इश्क भरवी बाजार ||४||

डफ संगे तुणतुणे

करी शाहिर प्रहार

तिचे नेतृत्व झुंजार

लेखणीचे धारदार ||५||

सिंहापरी गरजे ती

वीरतेशी दृढ नाते

उठे हि सळसळून

लकाकते तिचे पाते ||६||

राजा शंभूची लेखणी

ग्रंथ हा बुद्धभूषण

जाण आहे इतिहासा

असा साहित्यभूषण ||७||

झुंज तिची वादळाशी

वेळ ती शिवशाहीची

लेखणीची हि ताकद

रग मराठी रक्ताची ||८||

हिच माझी सोबतीण

बलशाली व देखणी

मुक्या भावना शोधीशी

माझी संगिनी लेखणी ||९||