लग्नानंतरही अफेअर

जशी बेइमानी दिशा पावसाची

तशी बेइमानी नशा प्रियतमाची

पहा साल झालेत लग्नास सोळा

तरी वाट पाही उगा प्रियतमाची

हवा दीप वंशास मुले आठ झाली

तरी खंत लागे सदा प्रियतमाची

नको धवल कोरू तुझी आज दाढी

बटा धवल झाली पहा प्रियतमाची

दिले सर्व वैभव तिच्या पायताळी

बटा अंतरी सजवतो प्रियतमाची

करी छान भार्या स्वयंपाक वेड्या

तरी लाळ घोटे सदा प्रियतमाची

तिचा गोड संसार चालीत आहे

तुला हासण्याची अदा प्रियतमाची

नसे भान बेभान वेडा दिवाना

अशी काय जादू तुला प्रियतमाची

वये साठ गाठून चढतील कवड्या

नको वासना तव मना प्रियतमाची