कातरवेळ

आज अशा या कातरवेळी

आठवण तुझी आली मला

रम्य असा तो भुतकाळ

वर्तमानासम उलगडला

आम्रतरूच्या छायेखाली

देवाणघेवाण वचनांची

आम्रवृक्ष तो आजही देतो

साक्ष आपुल्या प्रेमाची

रुसवा, फुगवा तुझा अबोला

वेड लावितसे माझ्या जीवा

भेटाया तुज रोज सखे

शोधे मी बहाणा नवा

वसले होते गाव प्रेमाचे

स्वप्नांच्या पलीकडले

आज आठवणी राहतात तेथे

'प्रेम' कुठे ते हरवले

नित अंगणी येतो 'रावा'

मज आशा तुझ्या निरोपाची

सरता सरेना ही 'कातरवेळ'

वाट पाहतो तुझ्या परतण्याची