एकी

एकदा काय झालं फुटली भांड्यांना वाचा

फुटली भांड्यांना वाचा !

भांडत बसले आपसात सारे कचा कचा !

चहाचं पातेलं तरातरा पुढे आलं म्हणतं काय ?

माझ्या शिवाय यांचा दिवस ऊगवत न्हाय !

सुर्याच्या आधी माझं दर्शन घेतात

तेव्हा कुठे ताजे तवाने होतात !

गाळणं म्हणालं गाळणं म्हणालं

फुगू नको उगी फुगू नको 

खोटेनाटे काही सांगू नको

गाळल्याशिवाय काय ते चहा पितात ?

माझ्या कडुनच गाळुन घेतात !

नाचत नाचत आला चिमटा

म्हणतो कसा ? 

माझ्यशिवाय कसे चहा घेतील?

मी नसलो तर त्यांचे हातच पोळतील !

तेवढ्यात आले बाबा म्हणाले थांबा रे थांबा !

बेट्यांनो तुम्ही असे भांडतात काय ?

चहा, साखर, पाणी 

दूध शेगडी राणी

पातेलं, चिमटा नी गाळणी

कपबशीचाही रुबाब असतो मोठा !

एकीने काम तुम्ही करता सारे

तेव्हा कुठे आम्ही चहा पितो रे !

भांडू नका ! तंडू नका एकीने रहा !

एकमेकांच्या नेहमी जवळ रहा !

पाजा छान छान चहा

लोक करतील सदा तुमचीच वाहवा !