चाचपडू नकोस हृदयात मित्रा

चाचपडू नकोस हृदयात मित्रा 

वेदना माझ्या अंतरीच्या 

आठवणी जपून ठेवल्यात मी 

सुखद माझ्या आणि तिच्या ||0||

वेडं आहे हृदय माझं 

आशेचं गाजर दाखवतो मी 

खोट्या खोट्या रोमँटिक दुनियेत 

अलगद याला माखवतो मी 

खुणा सापडतील हृदयावर 

तिच्या माझ्या ओळखीच्या 

आठवणी जपून ठेवल्यात मी 

सुखद माझ्या आणि तिच्या ||1||

मलाही माहीत आहे चांगलं 

प्रवास याचा एकटा आहे 

यालाही नक्की समजतं 

त्रास याचा एकटा आहे 

होरपळून टाकत आहेत आता 

ज्वाळा तिच्या आठवणींच्या 

आठवणी जपून ठेवल्यात मी 

सुखद माझ्या आणि तिच्या ||2||

फक्त श्वास घेण्यापुरतं 

काम याचं असतं तर 

प्रेमाच्या या विषयाशी 

देणं घेणं नसतं तर 

दुःख कधीच झालं नसतं 

वेदना नसत्या प्रीतीच्या 

आठवणी जपून ठेवल्यात मी 

सुखद माझ्या आणि तिच्या ||3||

नाही कोणी आपलं तर 

दुःख कशाला मानावं 

जगता येतं एकटं ही 

हसत हे मानावं 

ओसाड रान बनलंय आता 

जळून प्रेमाचा बगीचा 

आठवणी जपून ठेवल्यात मी 

सुखद माझ्या आणि तिच्या ||4||