बकुळ फुला
बकुळ फुला
1 min
13.1K
आज जरा कौतुकच घडलं
एक बकुळ फूल नजरी पडलं
व्हॉट्सअॅपच्या शुभसंदेशाखाली
अक्षराऐवजी तेच शोभून दिसलं
आठवणींची गाडी वेगाने धावली
बकुळ फुलांची आठवण गाठली
शाळेच्या आवारात एकमेव अशी
बकुळ झाडाची सावली हसली
छान सडा पडलेला असायचा
सुगंध बकुळीचा दरवळायचा
खेळाच्या तासाला मैदानावर
फुले वेचायचा, छंद असायचा
लहान, नाजूक बकुळ फूल
पण आकार रेखीव, सुंदर
शाळेतून घरी परतताना
फुले न्यायची ओंजळभर
आजही माझ्या मनाच्या कोपऱ्यातून
बकुळ फुलांचा सुगंध दरवळतोय
श्वासात विरघळलेल्या सुगंधातून
आठवणींचा कोपरा उजळतोय