भक्तीचा महापूर

वारकरी भक्तीभावे

विठ्ठलाच्या वारीमधे

पांडुरंग भेटीचिये

आस लागे मनामधे   (१)

वर्षे कितीक लोटली

भक्तीमार्ग हा वारीचा

मनी श्रद्धाभाव दाटे

नाम विठ्ठलाचे घेता    (२)

हरीनाम भजनात

धुंद टाळ्या गजरात

वारी चाले अभंगात

दाटे आनंद मनात     (३)

चाले अश्वाचे रिंगण

भक्तां सहस्त्र भोजन

टाळ चिपळ्या गजर

करी नाचून भजन      (४)

भावभोळा भक्तिभाव

देव जाणे मनोमनी

कृपा करी भक्तांवरी

भक्ती खरी पारखूनी   (५)

मेळा नाचे वैष्णवांचा

आषाढीला वाळवंटी

महापूर हा भक्तीचा

देव मनी सुखावती   (६)