आई

आई संस्कारी नात्यांचा सुंदर गोफ

अविरत उमलणारं स्नेहाचं रोप.

आई संवेदनशील हृदयाचा सुखद लळा;

ऊर्जा देहाची व मनाचा जिव्हाळा.

आई अंगणातील रांगोळी साजरी;

सोडून जाई कुठेना लेकुरवाळी बावरी.

आई ममता-वात्सल्याचा अभंग गाभारा;

ऊन्हातील छाया अन गारव्यातील उबारा.

आई सुख-दुःखाचा रम्य सोहळा;

संकटातही फुलणारा गुलमोहर कोवळा.

आई शब्दफुलांचा मोहक सुगंध;

त्याग-समर्पणाचा अतूट असा बंध.

आई भगवंत नामातील गोड वाणी

रखरखीत वाळवंटातील थंडगार पाणी.

आई आरतीत वाजणारी मधुर टाळी;

वेदनेनंतर निघणारी प्रथम करूण आरोळी.

आई सुख-शांती-समृध्दीच लेणं;

संस्कृतीच विद्यापीठ रूपाने विधात्याचं देणं.

आई आपला मोक्षधाम मथुरा-काशी;

स्वर्ग मानावा आईच्या पायापाशी.