પાદરની ધૂળ

.
 પગરખાંમાં રહી ગઈ છે પાદરની ધૂળ, આ શહેરમાં કેમ કરી રોપવી ?
સાચવીને રાખી છે હૈયે સ્મૃતિની મૂડી બોલો, એને કોને તે સોંપવી ?
ગાર કરેલી પેલી ઓસરીની કોરે,
હજી ચકલીઓ ટોળે વળે છે,
બંધ કરેલા પેલા ઓરડાની અંદર,
કોણ દીવો લઈને હજીયે મળે છે ?
ભીંતે ચોંટેલા પેલા સન્નાટાને,
ગામની એ વાતોમાં ગોઠવવી,
પગરખાંમાં રહી ગઈ છે પાદરની ધૂળ... તળાવના પાણીમાં નાખેલો પથ્થર,
હજી કુંડાળાં બનીને રેલાય,
ગામ આખું છૂટી ગયું પાછળ છતાંય, એની સુગંધ તો ભીતર જ દેખાય. પતંગિયાની પાંખ જેવી નાજુક યાદો,
આ કાચના શહેરમાં શી રીતે સાચવવી ? પગરખાંમાં રહી ગઈ છે પાદરની ધૂળ...

 -દિનેશ નાયક 'અક્ષર'