મારી માવલડી
મારી માવલડી
મારી માવલડી
નયનોથી વરસે અવિરત સ્નેહધારા એવી મીઠડી માવલડી
વ્હાલપની વેલડી જેની જગમાં જડે ન જોડ્ય એવી માવલડી,
સાત સમુંદર સહી કેઉં ને લેખની કરું જંગલ સારા
તોય ગુણ ન વર્ણવાય એવી ગુણવંતી મારી મીઠી માવલડી,
વ્હાલપની વેલડી જેની જગમાં જડે ન જોડ્ય એવી માવલડી,
નવરાશે ઘડી ઈશ્વરે આપી ભેટ મુને આ મોંઘેરી
નવખંડમાં પૂજાય આ સ્નેહની સરિતા જેવી મીઠી માવલડી,
વ્હાલપની વેલડી જેની જગમાં જડે ન જોડ્ય એવી માવલડી,
હેત અવિરત જેના છલક્યા કરે, મારીને મુજને ખુદ રડે,
પ્રેમનો સાગર જેના ભીતરે ખળભળે એવી મીઠી માવલડી,
વ્હાલપની વેલડી જેની જગમાં જડે ન જોડ્ય એવી માવલડી,
કહે "સંગીતા' કર જોડી, નમજો સહુ હેતે ભાળી માવલડી,
અડસઠ તીર્થ વસે જેના ચરણે, એવી મહાન જગમાં માવલડી,
નયનોથી વરસે અવિરત સ્નેહધારા એવી મીઠડી માવલડી,
વ્હાલપની વેલડી જેની જગમાં જડે ન જોડ્ય એવી માવલડી.