ખાનદાની
ખાનદાની
હર કદમ સતત કમાઈ છે જિંદગીમાં અમે ખાનદાની,
બસ જરૂર પડે ત્યાં ખર્ચ્યા કરૂં છું ખેલદિલીથી ખાનદાની !
કોણ મંઝિલોની કરે પરવા અંતરના આનંદની રાહ પર,
કદમ કદમ બસ વેરી ને હું વહેંચ્યા કરૂં છું ખાનદાની !
જીતાયા છે જંગ કંઈ, વગર યુદ્ધે અમારા જીવન મોરચે,
વિશ્વાસથી હાર્યા જ કરૂં છું હંમેશા ખોરડાની ખાનદાની !
ભલે ને કરતો રહ્યો ઈર્ષ્યા આ જમાનો મારી મૌલિકતાની,
તોય દાદ મેળવી જ જાય છે મારી લખવાની ખાનદાની !
ક્યાં માપવા જાઉં અમર્યાદ આકાશની સીમા હું મર્યાદિત,
ને પંથ કાપી નાંખે છે મારી આ મજબૂત પાંખોની ખાનદાની !
રણમાં પણ જીવી ગયા અમે ઝાકળની બૂંદોના ભરોસે,
ને મોતને મ્હાત આપતી રહી કાયમ તરસની ખાનદાની !
નાવના ભરોસે બેસી રહેત અમે આખી જિંદગી તો શું થાત,
સામે પાર લાવી છે અમોને એક તુચ્છ તરણાની ખાનદાની !
'પરમ' દિપક તો પ્રગટાવી દીધાં ઝંઝાવાત વચ્ચે અમે,
ને ખરે ટાંકણે કામ આવી 'પાગલ' પવનની ખાનદાની !