જન્માષ્ટમી

જન્માષ્ટમીએ જન્મનારો કૃષ્ણ ક્યાં ?

પિંજર કદી એ તોડનારો કૃષ્ણ ક્યાં ?

ઉજવાય જેની ભાવથી જન્માષ્ટમી

ભક્તો જગે તારનારો કૃષ્ણ ક્યાં ?

સિધ્ધાંતને નેવે ચઢાવી ચાલતાં

સ્વાર્થીજનો પર ખોફનારો કૃષ્ણ ક્યાં ?

આફત હવે તો માનવીને ખોતરે

એ આંગળી પર ધારનારો કૃષ્ણ ક્યાં ?

શિશુપાલને કંસો વધ્યાં છે ઠેરઠેર

એ ક્રોધથી ડામનારો કૃષ્ણ ક્યાં ?

જે ધર્મ કેરા યુધ્ધમાં આગળ રહે

રથ પાર્થનો હાંકનારો કૃષ્ણ ક્યાં ?

ગોકુળ તણી ગોપી ઝૂરે છે આજ તો

મોહન બની મોહનારો કૃષ્ણ ક્યાં ?

ગાયો તણો રખવાળ, જો ગાયો કપાય

ગાયો હવે પાળનારો કૃષ્ણ ક્યાં ?

જન્માષ્ટમી આવે વળી જાતી રહે

આત્મા ખરો જાણનારો કૃષ્ણ ક્યાં ?