હું તારાથી વધુ કાંઈ અપેક્ષા તો

હું તારાથી વધુ કાંઈ અપેક્ષા તો નથી કરતો,

તું કંઈ આપે ન આપે હું ઉપેક્ષા તો નથી કરતો,

કરી છે હર ઘડી મારી કસોટી ફાવે તેમ તેં

હું ક્યારેય પણ ખુદા તારી પરીક્ષા તો નથી કરતો,

શું આપ્યું ને શું ન આપ્યું એ રહેવા દે બધી વાતો,

બધી આ બાબતોની હું સમીક્ષા તો નથી કરતો,

મને તારાથી જે રાહત મળી તે એટલી જ ખુદા,

કરું ગુના છતાં પણ કોઈ શિક્ષા તો નથી કરતો,

કહું છું ક્યાં કયામત લગ રાહ જોતો રહે મારી,

હું પણ 'સંગત' કયામત લગ પ્રતીક્ષા તો નથી કરતો.