દફનાવી નથી શકતો
દફનાવી નથી શકતો
મને છે કેટલો અફસોસ સમજાવી નથી શકતો,
તમે આવી નથી શકતા, હું બોલાવી નથી શકતો,
ઊભો છું બારણે એના છતાં મળવાનો ડર લાગે,
શું કહેશે એ વિચારે દ્વાર ખખડાવી નથી શકતો,
વચન એને મેં આપ્યું છે સદા હસતા જ રહેવાનું,
દુઃખી હોવા છતાં હું આંસુને લાવી નથી શકતો,
સખત મહેનતથી કિસ્મત પણ અહીં પલટાય છે દોસ્તો,
છું એ મજદૂર જે તકદીર પલટાવી નથી શકતો,
મને હેરાન કરવાનો વિચારી તું કસોટી લે,
ઘણું દુઃખ થાય છે તું હરવખત ફાવી નથી શકતો,
અહમ આડે અહીં આવે છે મારો ઓ ખ઼ુદા કેવો,
ફકીરી હાલ છે ને હાથ ફેલાવી નથી શકતો,
તમારો સાથ માંગુ છું ફકત તો એટલે "સંગત",
છે મારી મજબૂરી હું ખુદને દફનાવી નથી શકતો.