ઘણીવાર થાય કે

આ તારાઓ પણ કોઈના પર મરતા હશે, શાયદ..

અને એની યાદમાં તુટી જઈને ખરતા હશે, શાયદ..

ફુલોમાં લાલ, પીળા, ગુલાબી રંગ કોણ પૂરતા હશે ?

રંગબેરંગી પતંગિયા આ ફુલોને ચૂમતા હશે, શાયદ..

રોજ સાંજે ક્ષિતિજને પાર સૂરજ કેમ ઢળતો હશે ?

સહુથી છાનોછપનો સંધ્યાને જઈ મળતો હશે, શાયદ..

રાત પડે ને રોજ આ રાતરાણી કેમ મહેકતી હશે ?

આસોપાલવની બાંહોમાં જઈ એ બહેકતી હશે, શાયદ..

ઝરણું ખળખળ વહી ને પથ્થરો ને શું કહેતું હશે ?

એ પ્રેમમાં ભીંજવી ને પથ્થરોને રીઝવતું હશે, શાયદ..

સમંદર કેમ રાતદિવસ સતત ઘુઘવાટ કરતો હશે ?

ચાંદને દૂર આકાશમાં જોઈ નિસાસા ભરતો હશે, શાયદ.