દર્પણ

જિંદગીની આ રઝળપાટ તો જો,

હરણફાળની આ હંફાટ તો જો,

એક અમથા ખાડાની ખપતે,

કેટકેટલીય ઝંઝાવાત તો જો,

શબ્દોની સાબિતિને ક્યાં કોઈ પૂછે અહીં,

આ કાગળ કેરો કકળાટ તો જો,

ખિસ્સાની ખુમારીએ ખેડાય છે જિંદગી,

આ નોટોનો સળવળાટ તો જો,

ઊગી રહેલી ઈચ્છાઓ પર,

આ જવાબદારીઓનો ઝણઝણાટ તો જો,

મનની માલીપા મેલ ભર્યાં ને,

આ ચહેરાના ચળકાટ તો જો,

લાગણીઓ થઈ ગઈ લુલી ને,

આ આડંબરનાં ઉભરાટ તો જો,

વહેમના વમળોમાં વિંટાયેલી,

આ વફાદારીનો વલોપાત તો જો,

કહે "કાજલ" આજ દિલથી એક જ,

ઊંડી એવી વાત તું જો,

મશીનનાં આ મોડર્ન યુગમાં,

માણસની રહી ગઈ મુઠ્ઠીભર ઔકાત તો જો.