આવ્યો મેહુલો રે!

ઓતર ગાજ્યા ને દખ્ખણ વરસિયા રે,

મેહુલે માંડ્યા મંડાણ

આવ્યો ધરતીનો ધણી મેહુલો રે!

નદી – સરોવર છલી વળ્યાં રે,

માછલી કરે હિલોળ,

આવ્યો ધરતીનો ધણી મેહુલો રે!

ખાડા ખાબોચીયાં છલી વળ્યાં રે,

ડેડકડી દિયે આશિષ,

આવ્યો ધરતીનો ધણી મેહુલો રે !

ધોરીએ લીધાં ધુરી-ધોંસરા રે

ખેડુએ લીધી બેવડી રાશ,

આવ્યો ધરતીનો ધણી મેહુલો રે !

ગાયે લીધાં ગાનાં વાછરું રે,

અસતરીએ લીધાં નાના બાળ,

આવ્યો ધરતીનો ધણી મેહુલો રે !