આભની અટારીએથી

એક વાદળનો ટૂકડો મસ્ત મજાનો મોજીલો

રમતો વિશાળ ગગનમાં બનીને છેલછબીલો,

હતી સહસ્ત્રરશ્મી જાજમ 'ને ટોળી પતંગોની

ઊડતો મેઘધનુની ડોરે બની એ રંગરંગીલો,

ના ગઈકાલનું ધુમ્મસ કે આવતી પળની વાછટ

ખરતાં તારા ઝીલીને મલકાતો એ અલબેલો, 

થઈ દોસ્તી હવા સંગ ફૂટ્યું ઝરમર ઝરણું

કરી છેડખાની સૂરોની વહ્યો સંગીતનો રેલો,

અફળાતો અથડાતો જાણે ક્યાં ક્યાં ભટકતો

ગાગરમાં જઈ સમાયો વ્હાલો એ સજીલો, 

ખોવાઈ ગઈ એ હસ્તી રેલાઈ ગઈ એ મસ્તી

સાગર થવાની લગનીમાં બંદી થયો એ ઘેલો !