ଫେରିଆସ ପରଦେଶୀ

ପୂର୍ଣ୍ଣଚନ୍ଦ୍ର ରଣା

ପରଦେଶୀ ତମେ ଫେରିଆସ ସେହି

କାଳ୍ପନିକ ଯୁକ୍ତ ଦୂର ଦେଶରୁ,

ତମ ବିନା ସବୁ ଲାଗୁଛି ଅଲଗା

ଭାବନା ଆସୁଛି ବୁକୁ ଭିତରୁ ll୧

ଏ ଘର ଏରୁଣ୍ଡି ଝୁରୁଛି ତମକୁ

ଝୁରୁଛନ୍ତି ପୁଣି ତୋ ବାପା ମାଆ,

ଘର ଚାରିକାନ୍ଥ ବାହୁନି କହୁଛି

ଫେରିଆସ ପରଦେଶୀ ତୋ ଗାଆଁ ll୨

ଝୁରୁଛି ତମ ଗାଁ ଅଙ୍କା ବଙ୍କା ରାସ୍ତା

ମନେ ପକାଉଛି ତମ ଗାଁ ନଇ,

ବରଷା ଦିନର କାଗଜ ଡଙ୍ଗାଟି

ଅପେକ୍ଷା କରିଛି ତମକୁ ଚାହିଁ ll୩

କୁନି କୁନି ଓଠେ ତମ କୋଳ ପିଲା

ଗାଇ ଯାଉଅଛି ସେ ମନେ ମନେ,

ବାପା ବାପା କହି ହାତକୁ ବାଡେଇ

ଶୋଇ ଯାଉଅଛି ମାଆର ସ୍ତନେ ll୪

ମୋ ମନ କାହିଁକି ଝାଉଁଳି ପଡୁଛି

ଜାଣି ପାରୁନାହିଁ ନିଜକୁ ନିଜେ,

ପଡି ଉଠି ମୁହିଁ ଜୀବନ ଜିଉଛି

ମୋ ମନ ଭିତରେ ତମକୁ ଖୋଜେ ll୫

ପର କରିବନି ପରଦେଶୀ ତମେ

ଭୁଲିବନି ତମେଜନମ ମାଟି,

ଅପେକ୍ଷାରେ ତମ ପତ୍ନୀ ପିଲା ଛୁଆ

ଅପେକ୍ଷାରେ ପୁଣି ତମ ମାଆ ଟି ll୬

ଡେରି କରନାହିଁ ପରଦେଶୀ ତମେ

ଫେରିଆସ ତମ ନିଜ ଗାଆଁକୁ,

ହସିବ ତମ ଗାଁ ହସିବ ଦୁନିଆଁ

କରିବେ ନିଜର ସବୁ ତମକୁ ll୭

ହାଟସିଂହାପୁର,ଯାଜପୁର

ମୋ. ୮୮୭୨୯୦୭୦୮୬