ଏକା ସେ ଧରମ ସାକ୍ଷୀ

କେଉଁ ଜନମର କେତେ ଦୋଷ ମୋର

ଏ ଜନମେ ଅଛି ବାକି ,

ସେହି କର୍ମଫଳ ଭୋଗ କରୁଛି ମୁଁ

ଏକା ସେ ଧରମ ସାକ୍ଷୀ ।(ଘୋଷା),

ଏ ଜନମେ ହେତୁ ପାଇବା ଦିନରୁ

କରିନି ତ କିଛି ପାପ ,

ତଥାପି କାହିଁକି କେଉଁ ଦୋଷ ଲାଗି

ଦେଲା-ବିହି ମୋତେ ଶାପ ।

ଲଲାଟରେ ମୋର ଲେଖିଦେଲା କିଆଁ

ଦୁଃଖିନୀ ତୁ ନିରିମାଖୀ (୧)

କେଉଁ ଜନମର କେତେ ଦୋଷ ମୋର

ଏ ଜନମେ ଅଛିବାକି....

ନ୍ୟାୟର ନିକିତି ଧରିଅଛି ଯଦି

ବିଧାତା ହାତରେ ତା'ର ,

କେମିତି ସେଥିରେ ପୁଣ୍ୟ ମୋର ନାହିଁ

ଅଛି ଖାଲି ପାପ ଭାର ।

ଏ ଯୁଗର ଆଉ ଏକ ଅହଲ୍ୟା ମୁଁ

ଚାହିଁଛି ତୁମକୁ ଡାକି ।(୨)

କେଉଁ ଜନମର କେତେ ଦୋଷ ମୋର

ଏ ଜନମେ ଅଛି ବାକି ।

ଆଉ କେତେ କାଳ ଜଳିବି ଏମିତି

ଯାତନା ଜୁଇରେ ନିତି ,

ତୁମରି କରୁଣା କଣିକାଏ ପାଇଁ

ଗଲାଣି ତ ଯୁଗ ବିତି ।

ଶାପିତ ଜୀଵନୁ ମୁକତି କେ ଦେବ

ତୁମେ ତ ଦେଉଛ ଠକି ।(୩)

କେଉଁ ଜନମର କେତେ ଦୋଷ ମୋର

ଏଜନମେ ଅଛି ବାକି ,

ସେହି କର୍ମଫଳ ଭୋଗ କରୁଛି ମୁଁ

ଏକା ସେ ଧରମ ସାକ୍ଷୀ ।।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।