ଲାଜରେ ହେଲିଣି ନାଲି

ଯମୁନା ଜଳରେ ତୁମ ପ୍ରତିଛବି

ଦିଶୁଅଛି ମୋତେ ଖାଲି ,

କେମିତି ଏଇଠି ଦେହ ପଖାଳିବି

ଲାଜରେ ହେଲିଣି ନାଲି ।

କାହିଁକି ଏମିତି ମୋ ସାଥେ ଖେଳୁଛ

କିବା କରିଅଛି ଦୋଷ ,

ସଖୀମାନେ ଯଦି ଏ କଥା ଜାଣିବେ

ବ୍ରଜେ କରିଦେବେ ଘୋଷ ।

ମୁଣ୍ଡରେ ତୁମକୁ ମୁଣ୍ଡେଇଛୁ ବୋଲି

ଏଡ଼ିକି ବହପ କାଢ଼ ,

ଭୁତ ହୋଇ ଲାଗି,ଲୋକ ଆଗେ ପୁଣି

ଗୁଣିଆ ସାଜିକି ଝାଡ଼ ।

ମୋତେ ଯେଉଁଭଳି କିମିଆଁ କଲଣି

ଉଦ୍ଧୁରିବା ବଡ଼ କଷ୍ଟ ,

ତୁମ ନଜରରୁ ବଞ୍ଚେଇବ କିଏ

ଅଛି ଆଉ କେଉଁ ଇଷ୍ଟ !

ଚାରିଆଡ଼ ଖାଲି ଦିଶେ କୃଷ୍ଣମୟ

ଏଥକୁ ମୋ ଭାରି ଡର ,

ତୁମ ସାଥେ ଭାବ ଅଛି ବୋଲି ଜାଣି

ଉଜୁଡ଼ିବ କାଳେ ଘର !

ଆଖିରୁ ତୁମକୁ ହଟେଇବା ଲାଗି

ଚାହୁଁନାହିଁ କିନ୍ତୁ ମନ ,

ଏଇ ସମସ୍ୟାର ପ୍ରତିକାର କର

କିଛି ଆହେ ଶ୍ୟାମଘନ ।।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।