ଖୁଣିବ ବା ମୋତେ କିଏ

          

ମାଆ ମୋତେ ଏଇ ଶିଖିପୁଚ୍ଛ ଖୋସି

ସଜାଇ ଦେଉଛି ନିତି ,

କଳାରଙ୍ଗ ଯେହ୍ନେ ଝଲସି ଉଠିବ

ସୁନ୍ଦର ଦିଶିବ ଅତି ।

ଭାଇଙ୍କର ରଙ୍ଗ ଗୋରା ତକ ତକ

ସତେ କି ଲହୁଣୀ ମଖା ,

ସେଥିପାଇଁ ମାଆ ଏତେ ବେଶ କରେ

କାଳେ ପଡ଼ିଯିବି ଫିକା । 

ହାତେ ସୁନା ଖଡ଼ୁ,ମୁଦ୍ରିକା,ବାହୁଟି

କାନରେ କୁଣ୍ଡଳ ସାଜେ ,

କଟିରେ ମେଖଳା,ପାଦରେ ନୂପୁର

ରୁଣୁଝୁଣୁ କରି ବାଜେ ।

ଗଳାରେ ମୋହର ରତ୍ନହାର ଝୁଲେ

ଖଞ୍ଜା ହୋଇଅଛି ମୋତି ,

କେଶ ବାନ୍ଧି ଦିଏ ଶିଖିପୁଚ୍ଛ ସହ

ସଜମଲ୍ଲୀ କଢ଼ି ନିତି ।

ପୀତ ବସନକୁ ପିନ୍ଧେଇ ଦେଇକି

ଗୋରୋଚନା ଚିତା ଦିଏ ,

ଯେ ଦେଖିବ ତା'ର ମନ ଲାଖିଯିବ

ଖୁଣିବ ବା ମୋତେ କିଏ !!