ଭାଙ୍ଗି ଦିଅନ୍ତି ତା' ଟାଣ
ଭାଙ୍ଗି ଦିଅନ୍ତି ତା' ଟାଣ
କଦମ୍ବ ବନେ କେ ବଇଁଶୀ ବଜେଇ
ଡାକୁଅଛି ମୋର ନାଆଁ,
ସେଇ ନିନାଦରେ ଚହଲି ପଡ଼ୁଛି
ସାରା ଗୋପପୁର ଗାଆଁ ।
ଚିନ୍ତା ଜରେ ମୋର ତନୁ ଅସକତ
କା'ରେ ଦେଖାଇବି ମୁହଁ ,
ନଗରଟା ସାରା ନାଗରା ବାଜିବ
ମୁଁ ଯେ ସତୀ ପଣେ ନୁହଁ !
ସେ ବଇଁଶୀ-ଧର ଭଗାରି କି ମିତ
କେହ୍ନେ ପରକ୍ଷିବି ମୁହିଁ ,
କା' ଆଗେ କହିଲେ କେ ଦେବ ଉତ୍ତର
ହାଟ ବସେଇବ ନାହିଁ !
ଶୁଣି ସେଇ ସ୍ଵନ,ଅସ୍ଥିର ଏ ମନ
ବାରବାର ହୁଏ ଟାଣି ,
ଧାଇଁ ଯାଆନ୍ତି ମୁଁ ତାଆରି ପାଖକୁ
ନାଆଁ ଡାକୁଛି ଯେ ଜାଣି ।
ପଚାରନ୍ତି ତାକୁ କି ଲାଗି ସେ ମୋର
ଦହଗଞ୍ଜ କରେ ପ୍ରାଣ ,
ଉତ୍ତର ନ ଦେଲେ ଭିଡି ଆଣି ଦାଣ୍ଡେ
ଭାଙ୍ଗି ଦିଅନ୍ତି ତା' ଟାଣ ।
ବି. ନିରୁପମା
ମାମୁରିଆ, ଛେଣ୍ଡିପଦା,ଅନୁଗୋଳ।