ଗାଆଁ ମାଟିର ମୋହ
ଗାଆଁ ମାଟିର ମୋହ
ସଜନା ଶାଗର ମହକରେ ଯହିଁ
ପଖାଳ କଂସା ବି ହସେ
ସଜନୀ ମୋହର ସେଇଠି ସଙ୍ଗାତ
ବାଡି ଅଗଣାରେ ବସେ ।
ପୋଦିନା ପତରେ ତେନ୍ତୁଳି ସହିତ
କଞ୍ଚାଲଙ୍କା ହେଲେ ମିଶା
ଲାଳ ଗଡିଯାଏ ଥପଥପ ହୋଇ
କି କହିବି ତାର ନିଶା ।
ତେଲିଆ ମୁଣ୍ଡର ଜଟିଆ ବେଣୀରେ
ଖଞ୍ଜି ଇଟିମୂଳା ଫୁଲ
ସତ ମୁଁ କହୁଛି ପ୍ରିୟା ମୋର ଦିଶେ
ମନମୋହିନୀର ତୁଲ ।
ମନେ ଅଛି ସାଙ୍ଗ ପୁଟୁସ୍ ଲଟାର
ଆମ ଚାଟଶାଳୀ ହତା
ନିଇତି ସେଇଠି ଲୁଚାଇ ଦିଏ ତା'
ବହିମୁଣା ଆଉ ଛତା ।
ଖୋଜି ଖୋଜି ଯେବେ ହାଲିଆ ହୁଅଇ
ଲାଜକୁଳୀ ସେଇ ଝିଅ
ମିଛଟାରେ ତାର ସାଥେ ଥାଇ କୁହେ
ହେଇଟି ପାଇଲି ନିଅ ।
ଶୀତୁଆ ସକାଳ ଆରତି ବେଳାରେ
ଶୁଭେ ଯେବେ ଘଣ୍ଟି ବାଜା
ଦେଉଳ ମୁହଁରେ ଦେଖା ହୋଇଯାଏ
ଦିଶୁଥାଏ କେଡ଼େ ତାଜା ।
ଛୁଟିବେଳ ହେଲେ ପୁଅଝିଅ ଆମେ
ଖୁସିରେ ହୋଇକି ମେଳ
ମାତି ଭଲ ଲାଗେ ଛୁଆଁ ଛୁଇଁ ସାଥେ
ଖେଳି ବୋହୂଚୋରି ଖେଳ ।
ଯେତେ ଯାହା କହ ଭୁଲି କି ହେବ ସେ
ପିଲାଳିଆ ଦିନ ସାଥୀ
ଉପରବେଳାର ଲେଉଟାଣି ଖରା
ଭରଇ ବିରହ ତାତି ।
ସେଥିପାଇଁ ସାଙ୍ଗ ଫେରିଯିବି ପୁଣି
ମୋ ମାଟି ମାଆର ଦେଶେ
ଗାଆଁ ମଶାଣି ମୋ ସ୍ବର୍ଗଦ୍ବାର ପରା
ଜଳିଯିବି ପରିଶେଷେ ।
ପ୍ରସନ୍ନ କୁମାର ମାଦଳା
ଘର ନଂ - ଏଫ୍ / ୧୩
ସେକ୍ଟର - ୪
ରାଉରକେଲା - ୭୬୯୦୦୨
ଦୂରଭାଷ - ୭୯୭୮୧୯୨୨୨୭