ଚାଚା ନେହେରୁ

ଶିଶୁଙ୍କର ପ୍ରିୟ ଚାଚା ନେହେରୁ ଗୋଲାପ ପ୍ରିୟ ସେ ନେତା

ଜନମ ଦିନକୁ ଶିଶୁଙ୍କୁ ସମର୍ପି ସମାଜକୁ ଦେଲେ ବାର୍ତ୍ତା ।

ଆଜିର ଶିଶୁ ଟି ଆଗାମୀ କାଲିର ନାଗରିକ ଏ ଦେଶର

ଶିଶୁର ଉତ୍ତମ ଯତନ କରିବା ଅଟନ୍ତି ସେ ଧରୋହର ।

ଜେଲରୁ ଚିଠି ଲେଖିଛନ୍ତି କେତେ ଝିଅ ଇନ୍ଦିରାଙ୍କୁ ବସି

ପ୍ରଧାନମନ୍ତ୍ରୀ ସେ ଦକ୍ଷ ହୋଇଲେ ମାନି ଉପଦେଶ ରାଶି ।

ଜେଲ ସମୟ ଉପଯୋଗ କରି ଲେଖିଲେ 'ଭାରତ ଖୋଜ'

ମହା ଇତିହାସ ରଚିଲା ପୁସ୍ତକ ଦେଶ ବିଦେଶରେ ଆଜ ।

ମହାତ୍ମାଙ୍କ ପ୍ରିୟ ପଟେଲଙ୍କ ସ୍ନେହ ମଣି କାଂଚନ ସଂଯୋଗ

ନବ ଭାରତର ନିର୍ମାଣ କଲେ ଭାରି ଶିଳ୍ପ କଲେ ଆଗ ।

ବିଦେଶୀ ମୁଦ୍ରା ବଂଚାଇବା ପାଇଁ ଆମଦାନୀ ରୋକିବାକୁ

ଶିଳ୍ପପତିଙ୍କୁ ଆବାହନ କଲେ ନୂଆ ଦେଶ ଗଢ଼ିବାକୁ ।

ପଂଚଶୀଳ ନୀତି ଆପଣାଇ ହେଲେ ବିଶ୍ଵରେ ପରିଚିତ

ବିଶ୍ଵ ବ୍ୟାଙ୍କକୁ ଗଢିବାରେ ଦେଲେ ସାହସ ଅପ୍ରମିତ ।

ଏସିଆନ୍ ଗେମ୍ ମାନସ ସନ୍ତାନ ଅଲିମ୍ପିକ ଏସିଆର

ଚୀନ୍ ପାକିସ୍ତାନ ପଡୋଶୀ ନୁହେଁ ସେ ଚୀର ଶତୃ ଭାରତର ।

ଆଗକୁ ବଢିଲା ବେଳକୁ ଭଗାରି ଗୋଡ଼ ଟାଣେ ବାରଂବାର

ଋଷିଆ ସହିତ ଉତ୍ତମ ସଂପର୍କ କରୁଥିଲା ଉପଚାର ।

ଗୁଣରେ ଆଦର କରି ବିଦେଶୀଙ୍କୁ ଚିହ୍ନାଉ ଥିଲେ 'ଅଟଳ'

ଦେଖ ଏ ଦେଶର ଭବିଷ୍ୟତ ମୁଖ୍ୟ ଧୈର୍ଯ୍ୟ ସାହସ ଯା ବଳ ।

ଚଉଦ ନଭେମ୍ବର ଅଣାନବେ ଜନ୍ମ ପ୍ରଥମ ପ୍ରଧାନମନ୍ତ୍ରୀ

ଇହଲୀଳା ସାଂଗ କଲେ ପ୍ରପୀଡ଼ିତ ସତେଇଶ୍ ମେ ଚଉଷଠି ।

'ଆଲୋକ ଟି ଲିଭିଗଲା' ବାପୁଜୀଙ୍କ ମୃତ୍ୟୁ ସଂବାଦେ କହିଲେ

ନେହେରୁ ନାହାନ୍ତି ଗୋଲାପ ସମର୍ପି ଶିଶୁ ଆଜି ମନେ ଭାଳେ !