दुर्दैवी आखाजी

आला आखाजी चा सण

माहेरवासिनी आनंदा उधाण,

बंधू येतील माहेरी न्यावया ,

मिळेल सांजरी खावया ll1ll

सर्वत्र हर्षोल्लास, 

मन माझे मात्र उदास,

आला आखाजी चा सण

हूरहुरले माझे मन, 

लोचनी दाटले आसू

कुठे हरवले बंधूचे हसू ll2ll

 

मायबापाचे बघवत नाही हाल

रडून रडून डोळे त्यांचे लाल ,

नित्य वदती कोरोंना बनला काळ

हिरावला का आमचा बाळ ll3ll

थरथरती आजी-आजा 

हाय रे दैवा काय दिलीस ही सजा, 

आम्ही दिसलो नाही का तुझ्या डोळा

तरुणांना नेण्याची ही का वेळा? ll4ll

वहिनी हरवली दुःखाच्या सागरात 

समजूत घालू कोणत्या शब्दात, 

कशी जाऊ तिच्या पुढे

पाहून तिला काळीज माझे उड़े ll5ll

पप्पा आले का?आपण पाहू 

मला आणतील खाऊ ,

रडत बिलगतो भाचा

बंद पडते माझी वाचा ll6ll

धाय मोकलून रडते तुझी सुता

काळाने का ओढून नेला पिता ,

कुठे शोधू मी आता 

काय सांगू मी तिची व्यथा ll7ll

आखाजी स भरू तुझी घागर

बंधू माझा मायेचा सागर,

 क्षणोक्षणी सार्‍या आठवणी,

कोण करेल माझी सासरी पाठवणी

अशी दुर्दैवी आखाजी 

नको देवा कुणाच्या नशिबी......

नको देवा कुणाच्या नशिबी.....