જાય છે

રાત આવે યાદ આવી જાય છે,
જુલ્મ તારા એ ગણાવી જાય છે.

આસમાને ચાંદ સળગે એકલો,
દાગ દિલને ચાંદ ચાંપી જાય છે.

માંગી માંગીને શું તું માંગીશ કહે;
હાથ ખાલી, હાથ ખાલી જાય છે.

એ ખુદા તારી આ દુનિયા બેવફા,
હર કો’ દિલને દર્દ આપી જાય છે.

વાળ ધોળા થઈ ગયા છે બસ હવે,
આ ડહાપણ ઠેસ મારી જાય છે.

વાત તારી માનવી મારી ફરજ;
વાત મારી તું તો કાપી જાય છે.

દીકરો છે એકનો એક આપણો,
તુજ ઉપર મા વારી વારી જાય છે.

ધારદાર છે આ સપનાં આંખનાં,
આંખને એ રોજ વાગી જાય છે.