શ્યામના સપના !

ચૂંદડી તેં શ્યામ, રંગેલી કરી,
વાંસળીથી શ્યામ, તે ઘેલી કરી.

મેં કર્યા રસ્તા હ્રદયમાં આવવા,
શ્યામ જો, મેં આંખમાં ડેલી કરી.

નીર ધારે ચાલતો તું આવજે,
પ્રેમરસની આજ મેં રેલી કરી.

બાવરી હું બાવરી વનવન ફરું,
શ્યામ શીદને ભાન ભૂલેલી કરી ?

શ્યામ તું તો, રુક્ષ્મણિનો કંથ છે,
કેમ  રાધા જગમહીં  પહેલી કરી ?

શ્યામ મળવા કુંજગલીઓમાં ફરું
વ્રજની ગોપીઓ મેં સાહેલી કરી.

ચૂલે આંધણ નાથ બળતાં જાય રે,
લોક હસતા, શ્યામ તેં છેલી કરી.

છોડ  મુજ નાજુક કલાઈ કહાન  તું
જો ચૂડીઓ તેં જ તુટેલી કરી.

શ્યામના ‘સપના’ નયનમાં હું સજુ
હેતની હૈયામાં  તેં  હેલી કરી.