ટેરવાંનાં સ્પર્શથી

સ્વપ્ન ભીનું થૈ સરકતું ટેરવાંનાં સ્પર્શથી,
ઝાંકળે આખું પલળતું ટેરવાંનાં સ્પર્શથી...

રાત આખી છેડતાં જો તાર એ સંગીતનાં,
મારું ઝાંઝરિયું ઝણકતું ટેરવાંનાં સ્પર્શથી...

આખું નભ ઝૂકી રહ્યું છે પૂર્ણિમાની રાતમાં,
શ્વેત તારલિયું ચમકતું ટેરવાંનાં સ્પર્શથી...

ને અધરની યૂગ્મ જોડીનું મિલન ગરમાવતું,
લાલ ફુલડૂ જો ઉપસતું ટેરવાંનાં સ્પર્શથી...

તર્ક છે કે તીર, સમજાતું નથી હું શું કરું?
મારું પારેવું ફફડતું ટેરવાંનાં સ્પર્શથી...