We welcome you to write a short hostel story and win prizes of up to Rs 41,000. Click here!
We welcome you to write a short hostel story and win prizes of up to Rs 41,000. Click here!

Srimani Priyadarsini

Children Stories Inspirational Others


4.7  

Srimani Priyadarsini

Children Stories Inspirational Others


ମାଆର ପ୍ରଥମ ସ୍ପର୍ଶ

ମାଆର ପ୍ରଥମ ସ୍ପର୍ଶ

4 mins 333 4 mins 333


 କଣ ହେଲା ? ଗର୍ଭରେ ଥିବା ଝିଅ କୁ ବଞ୍ଚେଇବୁ ! ହାୟରେ ତୋ ପୋଡ଼ା ଭାଗ୍ୟରେ ଏଇଆ ଥିଲା । ମଲା ମୋ ବଂଶ ବୁଡିବ ଏବେ । ରାଗ ଗରଗର ହୋଇ ବୋହୂ ସୁନୀତା ଙ୍କୁ ତାଙ୍କର ଶାଶୁ ଗାଳି କରି ଚାଲିଥାନ୍ତି । କାହିଁକି ନା ସୁନୀତା ଚାହୁଁ ନଥିଲେ ତାଙ୍କ ଗର୍ଭରେ ଥିବା ଶିଶୁକନ୍ୟାକୁ ନଷ୍ଟ କରିବା ପାଇଁ । ସୁନୀତା କାନ୍ଦି କାନ୍ଦି ଫୋନ୍ ରଖି ଦେଲେ । ତିନି ତିନି ଥର କନ୍ୟା ଭ୍ରୁଣ ହତ୍ୟା ପରେ, ବହୁ କଷ୍ଟରେ ଗର୍ଭରେ ଥିବା ଏ ଶିଶୁ କନ୍ୟାଟିକୁ ବଞ୍ଚାଇବାକୁ ଚାହୁଁଛି । ତଥାପି, ଶାଶୁଘର ଲୋକ..! ନା, ଯେମିତି ହେଲେ ତୋତେ ବଞ୍ଚାଇବି କହି ସୁନୀତା କାନ୍ଦି ପକାନ୍ତି ।

  ସୁନୀତା ଙ୍କ ସ୍ବାମୀ ସମୀର ଡାକ୍ତରଙ୍କ ସହ ସୁନୀତା ପାଖକୁ ଆସନ୍ତି । ଡାକ୍ତର କହୁଥାନ୍ତି " ଦେଖନ୍ତୁ ଏପରି ଶିଶୁ ନଷ୍ଟ ଭଳି ଘୃଣ୍ୟ କାମ କରନ୍ତୁନି, ନହେଲେ ମୁଁ ଆଇନ୍ ର ଆଶ୍ରୟ ନେବି । ମୁଁ ରାକ୍ଷସ ନୁହଁ ଯେ ଗର୍ଭରେ ଥିବା ଶିଶୁ କନ୍ୟା ର ହତ୍ୟା କରିବି...!" ସମୀର କହୁଥାନ୍ତି -" ସାର୍, କେହି ଚାହୁଁ ନାହାନ୍ତି ଝିଅଟିଏ ହେଉ ବୋଲି, ପ୍ଲିଜ୍ ସାର୍ ପ୍ଲିଜ୍ " । ଡାକ୍ତର ରାଗି ଯାଇ ସମୀର ଓ ସୁନୀତା ଙ୍କୁ ତାଙ୍କ କ୍ଲିନିକ୍ ରୁ ଚାଲିଯିବାକୁ କୁହନ୍ତି । ସମୀର ସୁନୀତା ଙ୍କ ଉପରେ ଚିଡି ଯାଇ କୁହନ୍ତି -" କେହି ଡାକ୍ତର ବି ଚାହୁଁ ନାହାନ୍ତି, କ'ଣ କରିବି ।"

  ସୁନୀତା କହୁଥିଲେ " କଣ ତୁମେ ଚାହୁଁଛ ପୁଣି ନିଜ ଶିଶୁ ର ହତ୍ୟା କରିବା ପାଇଁ ? ଯିଏ ଦୁନିଆ କଣ ଜାଣିନି ? ଏଥର ଝିଅ ହେବ ହିଁ ହେବ । କେହି କିଛି କରିପାରିବନି ମୋର ।" ସମୀର ଆଉ କିଛି ନକହି ସୁନୀତା ଙ୍କୁ ନେଇ ଘରକୁ ଚାଲି ଆସନ୍ତି । ଘରେ ପହଞ୍ଚୁ ପହଞ୍ଚୁ ସୁନୀତା ଙ୍କ ଶାଶୁ ମଧ୍ୟ ପାଟି ତୁଣ୍ଡ କରିବା ଆରମ୍ଭ କରିଦେଲେ । ସୁନୀତା ନିଜ ବେଡ୍ ରୁମ୍ କୁ ଯାଇ ହାତ ଦୁଇଟିରେ ମୁହଁକୁ ଲୁଚେଇ କାନ୍ଦିଲେ । କଣ ସେ ପାପ କରୁଛି, ଶିଶୁକନ୍ୟା କୁ ଗର୍ଭରେ ରଖି ? ଏହା କହି ସୁନୀତା ତାଙ୍କ ଗର୍ଭ କୁ ଆଉଁସି ଦେଲେ ।

  ଗର୍ଭରେ ଥିବା ଶିଶୁକନ୍ୟା ଟି ସବୁ ଲକ୍ଷ୍ୟ କରୁଥିଲା । ସୁନୀତା ର କ୍ରନ୍ଦନ ଜାଣିପାରି କହିଲା," ଏ କିଏ ? ଏ କାହିଁ କାନ୍ଦୁଛି ? ମୁଁ କଣ ତାକୁ କଷ୍ଟ ଦେଉଛି କି ! କହି ଗୋଇଠା ଟିଏ ମାରିଲା ।" ଶିଶୁକନ୍ୟା ପେଟ ଭିତରେ ରହି ଗୋଇଠା ଟିକେ ମାରିବାରୁ ସୁନୀତା ଙ୍କ କାନ୍ଦ ବନ୍ଦ ହୋଇଗଲା , ସେ ହସିଦେଲେ । ଶିଶୁ କନ୍ୟା ଟି ସୁନୀତା ଙ୍କ ହସ କୁ ଅନୁଭବ କରି ଚକିତ ହୋଇଗଲା । ଏଁ ୟେ ପରା ଟିକେ ଆଗରୁ କାନ୍ଦୁଥିଲା, ପୁଣି ହସିଲାଣି ।"

 ଏ ଅନ୍ଧାରୁଆ ଜାଗାରେ ରହି ଅତିଷ୍ଟ ହୋଇଗଲିଣି । ବାହାର କର ହେ ମୋତେ । କେହି ଶୁଣୁନ କଣ ପାଇଁ ? ସେତିକିବେଳେ ସୁନୀତା ର ଶାଶୁ ଆସି ତାକୁ ବହୁକଥା ଶୁଣାଉଥିଲେ । ଶିଶୁକନ୍ୟା ଟି ଭାବୁଥିଲା -" ଏ ବୁଢ଼ୀ କିଏ ବା, ଏତେ ଗପି ଚାଲିଛି ! ଚୁପ୍ ରହିବାର ନା ବି ଧରୁନି । ଏଁ, ଏ ପୁଣି କାନ୍ଦିଲା କଣ ? ସୁନୀତା ର ଶାଶୁ କହୁଥିଲେ -" ଜନମ କଲେ ଏ ଝିଅ କୁ କୋଉଠି ପକେଇ ଦେବୁ, ଆମର ଲୋଡା ନାହିଁ ଝିଅ । ଶିଶୁକନ୍ୟା ଟି ସୁନୀତା ଶାଶୁ ର କଥା ଜାଣିପାରି କହିଲା -" ବୁଢ଼ୀ କଣ କହିଲୁ, ମୋତେ କୋଉଠି ପକେଇ ଦେବୁ ! ତୋର ଏତେ ସାହସ, ରହ ମୁଁ ଆଗ ବାହାରକୁ ଯାଏ ତୋ କଥା ବୁଝୁଛି ।"

 

  ଶିଶୁକନ୍ୟା ଟି " ଓଃ ଆଉ କେତେଦିନ ରହିବି ଏ ଅନ୍ଧାରୁଆ ଜାଗାରେ, କହୁଥିବା ବେଳେ ତାକୁ ଲାଗିଲା କେହି ଜଣେ ଦୌଡୁଛି । ସେ ଜାଣିଗଲା ଯେ ଯିଏ ତାକୁ ଏ ଅନ୍ଧାରୁଆ ସ୍ଥାନରେ ରଖିଛି ସେ ହିଁ ଦୌଡୁଛି । " ରୁହ ହେ, ଏମିତି ଦଉଡ଼ିଲେ ମୋ ହାତ ଗୋଡ ଭାଙ୍ଗି ଯିବ ପରା, ରହିଯାଅ ରହିଯାଅ !"ସୁନୀତା ତାର ଶାଶୁଘର ଲୋକ ଗର୍ଭରେ ଥିବା ଶିଶୁ କନ୍ୟା କୁ ମାରିବା ପାଇଁ ଯୋଜନା କରୁଥିବା ବେଳେ କୌଣସି ମତେ ଜାଣି ଦେଇଥିଲା । ସେଥିପାଇଁ ଲୁଚି କରି ଦୋୖଡି ଦୋୖଡି ଆସି ତାର ବାପ ଘରେ ପହଞ୍ଚି ଯାଇଥିଲା ।

ବାପା, ମାରିଦେବେ ମୋ ଝିଅକୁ । କିଛି ଉପାୟ ନଥିଲା ତେଣୁ ଚାଲି ଆସିଲି , କହି ସୁନୀତା କାନ୍ଦିବାକୁ ଲାଗିଲେ । ସୁନୀତା ଙ୍କ ବାପା ତାର ଆଖିରୁ ଲୁହ ପୋଛି କହିଲେ -" କ୍ଷମା କରିବୁ ମାଆ, ମୋର ଭୁଲ୍ ତୋତେ ଏଭଳି ଘରେ ବାହା ଦେଇଥିବାରୁ । ତୁ ଚିନ୍ତା କରନା ମାଆ, ତୋ ବାପା ବଞ୍ଚିଛି । ତୋର କିଛି ବି ଅସୁବିଧା ହେବନି । ତୁ ଆରାମ ରେ ରହ । ଆଉ ମାତୃତ୍ବ ଲାଭ କରି, ମାଆ ଡାକ ଶୁଣ ।"

  

  ସୁନୀତା ର ବାପା ଏତିକି କହି ସୁନୀତାର ଗର୍ଭରେ ଥିବା ଶିଶୁକନ୍ୟା କୁ କୁହନ୍ତି -" ଆମ ମହାରାଣୀ କେବେ ଆସୁଛନ୍ତି ? ମୁଁ ଅଜା ଡାକ ଶୁଣିବା ପାଇଁ ବହୁତ ବ୍ୟାକୁଳ ହେଲିଣି ।" ତାଙ୍କ କଥା ଶୁଣି ଶିଶୁକନ୍ୟା ଟି ଖୁସିରେ ଗୋଇଠା ଗୋଟେ ମାରିଲା । ସୁନୀତା ର ବାପା ହସି ହସି ଚାଲିଯାନ୍ତି । ଶିଶୁକନ୍ୟା ଟି ଶେଷରେ ଜାଣି ଗଲା ଯେ - " ଏ ଅନ୍ଧାରୁଆ ଘରେ ମୋତେ ଯିଏ ରଖିଛି, ସେ ମୋର ମାଆ । ଆରେ ! ମୋର ମାଆ ମୁଁ ଝିଅଟିଏ ବୋଲି ଏତେ କଷ୍ଟ ସହୁଛି । କେବେ ସେମାନଙ୍କୁ ପାନେ ଚଖେଇବି ରୁହ ।"

   କିଛି ଦିନ ପରେ ଶିଶୁକନ୍ୟା ଟି ପେଟ ଭିତରେ ରହି ବିରକ୍ତ ହୋଇଗଲା । ଅର୍ଥାତ୍ ସୁନୀତା ର ପ୍ରସବ ଯନ୍ତ୍ରଣା ଆରମ୍ଭ ହୋଇଗଲା । ସୁନୀତା ର ବାପା ତାକୁ ମେଡିକାଲ୍ ନେଇ ଯାଆନ୍ତି । ଶିଶୁକନ୍ୟା ମଧ୍ୟ ଜାଣିଗଲା ଯେ ତାର ମଧ୍ୟ ଏବେ ଦୁନିଆ ଦେଖିବାର ସମୟ ଆସିଗଲା । ଖୁସି ହୋଇ ହସି ପକେଇଲା । ଏହାପରେ ନିଜକୁ ଆବିଷ୍କାର କଲା ଜଣକ କୋଳରେ ! "ଏ କିଏ ! ଏତେ ସୁନ୍ଦର ଆଖି, ତଥାପି ଆଖିରୁ ଲୁହ ବହି ଚାଲିଛି । ଏ ସେଇ ନୁହେଁ ତ, ଯିଏ ମୋତେ ଅନ୍ଧାରୁଆ ଜାଗାରେ ରଖି କାନ୍ଦୁଥିଲା । ଆରେ ହଁ ! ୟେ ପରା ମୋର ମାଆ ।" ସୁନୀତା ନିଜ ଶିଶୁକନ୍ୟା ର ମୁଣ୍ଡ ଆଉଁସି ଦେଇ ତାର ମଥାରେ ଏକ ଚୁମ୍ଭନ ଦେଇ ହସିଦେଲେ । ମାଆର ପ୍ରଥମ ସ୍ପର୍ଶ ପାଇ ମଧ୍ୟ ଶିଶୁକନ୍ୟା ଟି ହସୁଥିଲା ଏକ ମନଲୋଭା ହସ ।



Rate this content
Log in